بحب فيكى تراب وطين
وميه بتشق الحجر
نيل بيسقى العطشانين
ويروى من خيره الشجر
بحب فيكى ليل شتا
وناس باللمه دفيانين
وناس عشان عزتك
فوق حدوك سهرانين
سطرت فوق أرضك كلام
شعر وغزل حب وهيام
وحبى ليكى كان غرام
عجز فى وصفه الكلام
انتى ومعزتك
فالقلب مربوطه
وجوه نن العين
فالقلب محطوطه
زى التاريخ مسطور
وحروفه مخطوطه
حبك كمان عندى
بعروقى منحوته
اسمك فودنى مصر
كوخك فعينى قصر
واللى بيعشق يشوف
جمال حبيبه حصر