أنا فلان الفلانى
مصرى وساكن
وساكن حالى
مش يعنى مكانى
سكونى ثبات
وخوف على بلدى وأوطانى
أنا فلان من شارع كيت
من كل حاره فمصر أنا جيت
سكنت القصر سكنت البيت
سكنت العشه وتربتى بيت
أنا فلان مسلم ومسيحى
بين صلواتى وبين تسبيحى
جارى أمانه سكونه فريحى
سواء كان مسلم أو حتى مسيحى
أنا فلان متربى فعزبه
وزيى كل شبابها اتربى
عرفت النخوه فوسط غطانها
وشوفت صحاب بتحب صحابها
أنا فلان ساكن فمدينه
فكل مناسبه نعلق زينه
وتلاقى الكل بيتعاون
ونرسم فرحنا بإدينه
أنا فلان اللى بنى السد
واللى بنى الأهرام والمجد
أنا فلان واسمى المصرى
واللى ميهزم وحدته حد