يا قصر مقفول ع الأمل
والحرس على بابه
واقف هناك بلطجى
همه يشيل بابه
و امله يهد الوطن
ويبيعه بترابه
المهم يلاقى الجنيه
حتى لو الوطن سابه
بصوتى انا من هنا
بكتب كلام واناديك
لما يضيع الوطن
مين غيره وطن يديك
ومنين هتلاقا السكن
لو سكنته الغربان
اللى بتصرف لتنهب
وعايزه بلد خربان
ذنب مين فى الطريق
تطلع عليه تقطعه
أو حد يمسك فلان
بسلاحه ويرفعه
ولو يعاند سرقته
بسلاحه هيقطعه
لا عمر كانت مصر
ولا عمر كان ناسها
عامله زى الديابه
تنهش فى أجناسها
طبع جديد ع البلد
ومنين المرض جاله
طول عمره يعيش للعيش
وشهامته فعياله
وسؤال يا كام بلطجى
يا دوب من كام سنه
كنت فجحرك مهدى
وده حسب علمنا
كنت جبان خواف
ايه اللى جابك هنا
فلحظه جات الشجاعه
وظهرت الفتونه
وعايز كمان تحرق
وتهد فى حلمنا
بعيد والله منالك
و مصر بقيالنا
والضلمه بقيالك
بيها هنيلنا
والسجن هنيالك