ملعون أبوها الثوره
لو جات عشان تخرب
ملعون كل اللى فيها
لو مسك سلاح ويضرب
هيه كانت بلطجه ثورة يناير
ولا سال دم الشهيد من شاب ثاير
كان سلاحه هوه جسمه
مش مطاوى وبانجوا ملفوف فى السجاير
كان إيمانه هوه ترسه
ودا خلا النظام محتاس وحاير
جاى النهارده بلطجى يقطع طريق
وناس تطبل وناس تهبل وتقولى ثاير
ولا مأجور فى البلد يعمل حريق
والشرطه شايفه ميتمسك وتقولى ثاير
يبقا ملعون أبوها الثوره
وملعون اللى عامل نفسه ثاير
اللى تمنه كام جنيه وعلبة سجاير
واللى فى الإعلام ناشط سياسى
وهوه أصلا م الأساس غاوى الكراسى
عيل يشتم فى الرئيس ناشط سياسى
مأجور يوسخ فى النضيف ناشط سياسى
كلام جديد معمول عشان حبة مناصب
أو عشان حفنة فلوس وعشان كراسى
مش مهم مصر تخرب
مش مهم الناس تموت
المهم إللى عايزه العدو
لازم يفوت
ميعرفش إنه الغبى غرقان معاها
مركبنا هيا مركبوا وهوه فمداها
لازم نفوق قبل الأوان منا يفوت
لازم نفوق من النهارده مفيش سكوت
واللى هيفكر يخرب أو يدمر
يبقا يسيب مصريته
يروح يدور ع اللى دفعوله الدولار
سعتها بس مش هيلاقى دار
هيعرف إنه لما باع بلده
كان خاين كان جبان كان حمار