شعارات

شعارات مكتوبه عالجدران

بص تشوفها فكل مكان

شعار بيقول القدس لنا

ده كلام معقول يملا العقول

طب لينا بإيه بكلام مكتوب

بتاريخ منهوب

 بخوف مزروع جوه القلوب

دا خوفنا خلا الهرم مقلوب

خلا السلاح ويا المقاوم طوب

وجاى تكتب على الحيطان

القدس لنا إكتب كان ياما كان

فعهد زمان كانت القدس فيوم لنا

كانت يوم ما جاها عمر

وعاد الخطر جاها البطل

صلاح الدين وجيشه انتصر

تقدر تقول كانت لنا أرضنا عزنا

النهارده قول ذلنا قهرنا غلبنا

أوعك تقول القدس لنا

من غير دم الشهيد لا يمكن تكون

من غير ما سهر يملا الجفون

عمر ما يحررها خوف وسكون

وقلب عشان ربه يبيع الكون

يحررها يعمرها يخضرها

سعتها قول القدس لنا

شعار بيقول القدس فخطر

مستنى إيه  ينزل مطر

يغسل عارنا ولا يزيل الخطر

كلامك لعب فوق الوتر

مستنى إيه طير أبابيل ترمى بحجر

إحلم وعيش عمر السما مهترمى بحجر

ولا فيوم ينزل مطر

لكن صحيح القدس فخطر